Quantcast
Channel: Maharashtra Times
Viewing all articles
Browse latest Browse all 189

युक २

$
0
0

प्रिय गणू,

कसा आहेस बाप्पा? छानच असशील म्हणा. म्हटलं, तू येण्याआधी काही गोष्टी तुझ्या कानांवर घालाव्यात. तसं तुला तर सगळंच माहीत असतं. पत्रात कस सगळं मनमोकळेपणाने मांडता येत ना म्हणून हा खटाटोप.

तू म्हणजे विद्येची देवता. यावेळी येशील तेव्हा सर्वांना जरा चांगली बुद्धी वाट. गणेशोत्सव हा सण सर्वानी एकत्रित साजरा करावा म्हणुन लोकमान्य टिळकांनी सुरू केला. पण आजकालच्या लोकांनी मात्र त्याचं बाजारीकरण करून टाकलंय. लोक एकमेकांशी तुझ्या मूर्तीवरून स्पर्धा करतात. प्रत्येक वर्षी उंच मूर्ती हवीच. कशाला ते त्यांनाच माहीत. तू आलास की नक्की विचार त्यांना आणि चांगला दम भर.

दुसरं म्हणजे मिरवणूक. त्या आगमनाच्या वेळी डीजे कशाला हवे असतात? त्यात भर म्हणुन तो अचकटविचकट डान्स. त्यात भर म्हणून फटाके वापरायचे. त्या धुराचा आजूबाजूच्या लोकांना होणाऱ्या त्रासाला कोण जबाबदार...? प्लास्टिक, थर्माकोल बंद झालं ते बरं झालं. तसंच मोबाइलमध्ये रमणाऱ्या लोकांचं. मला कळत नाही, लोक तुझ्या पाया पडायला येतात की, सेल्फी काढायला. या सगळ्या मंडळींना चांगली बुद्धी दे.

तुझ्या आवडीचे उकडीचे मोदक करून ठेवणार आहे. तू लवकर ये. आम्ही वाट पाहतोय.

तुझी एक भक्त,

हेमांगी सावंत,

एसएनडीटी कॉलेज.

प्रिय बाप्पा,

सगळीकडे तुझ्याच स्वागताची तयारी सुरू आहे. पण एक गोष्ट ठळकपणे जाणवते. ती म्हणजे, तुझी भक्ती करण्यामध्येसुद्धा आता स्पर्धा सुरू झाली आहे. आजकाल प्रत्येक गल्लीचा, प्रत्येक नाक्याचा एक स्वतंत्र राजा असतो. प्रत्येक राजाचा भव्यदिव्य पाद्यपूजन सोहळा, आगमन सोहळा आणि बरंच काही. शिवाय मिरवणुकांमध्ये जी गाणी वाजतात ना, ती ऐकून तुलाच तुझ्या आसनावरून उठून तिथून पळून जावंसं वाटेल.

वास्तविक गणेशोत्सव म्हटलं की देवावरचं प्रेम आणि भक्ती दर्शवणारी कितीतरी गाणी आठवतात. पण काही अपवाद वगळता, नको ती गाणीच ऐकायला मिळतात. गणेशोत्सव म्हणजे मंतरलेलं, गणेशभक्तीनं भारलेलं वातावरण. आम्हाला हा, लोकांना एकत्र आणणारा गणेशोत्सव आवडतो. बाप्पा, हे सगळं असंच अनुभवायला मिळेल ना आम्हाला...?

माझी तुला एकच विनंती आहे. गणेशोत्सवाच्या नावाखाली पैशांचा खेळ मांडणाऱ्या आणि भक्तीचा बाजार मांडणाऱ्या लोकांना सुबुद्धी दे. 'जनसेवा हीच ईश्वरसेवा' ही उक्ती आचरणात आणण्याची आम्हाला शक्ती दे.

तुझी लाडकी भक्त,

हेमाद्री लुडबे

रामनारायण रुईया कॉलेज

बाप्पा,

कसा आहेस तू? प्रत्येक मंडळात चर्चा आहे ती फक्त तुझीच. बाप्पासाठी अकरा दिवस काय करायचं, प्रत्येक दिवशी काय नवीन करायचं, जेणेकरून या आठवणी आयुष्यभर सोबत राहतील. या सगळ्या गोष्टींची तयारी करण्यात छोट्यांपासून मोठ्यांपर्यंत सगळेच उत्साही आहेत. या सगळ्यामध्ये, अनेक ठिकाणी चालू असलेले आगमन सोहळे, पाटपूजन आणि डीजेच्या गाण्यांवर बेभान होऊन नाचणारी मंडळी, हे सगळं पाहून दचकला असशील ना?

आजपर्यंत तू खूप काही दिलं आहेस. नेहमी आमच्या पाठीशी उभा राहतोस. काहीही झालं तरी, बाप्पा आहे ना असा विचार मनात येतो आणि खूप धीर मिळतो. टिळकांनी सुरू केलेल्या सार्वजनिक गणेशोत्सवाचं आजचं रूप हे खूपच वेगळं आहे. लोक एकमेकांशी स्पर्धा करायला लागले आहेत. आणि ह्या सगळ्यामध्ये अनेक चुका घडतात आणि मग समाजाचं भान उरत नाही. यापुढे उत्सवाला आलेलं हे नको ते स्वरूप बदलण्याचा आमचा प्रयत्न नक्कीच असेल. भविष्यकाळात मुख्यत: पर्यावरणाचं भान राखून गणेशोत्सव साजरा करण्याचा आम्ही प्रयत्न करू. आम्ही केलेल्या चुका माफ करून भविष्यकाळात तुझी सेवा चांगल्या प्रकारे आमच्याकडून करून घे.

शिवानी तुंगे, डी. जी. रुपारेल कॉलेज

मोबाइल अॅप डाउनलोड करा आणि राहा अपडेट


Viewing all articles
Browse latest Browse all 189

Trending Articles



<script src="https://jsc.adskeeper.com/r/s/rssing.com.1596347.js" async> </script>