स्वयंपाकघरात औषधी गुणधर्म असणारे अनेक घटक असतात. त्याचा आरोग्य जपण्यासाठी उपयोग करु शकतो. विशेषत: त्वचेची काळजी घेण्यासाठी किंवा त्वचेशी निगडित समस्यांवर घरगुती उपाय केले जातात. अतिशय साधे-सोपे आणि कोणत्याही प्रकारचा अपाय न होणारे उपाय घरच्या घरी करू शकतो. त्यातील महत्त्वाचा घटक म्हणजे बेसन. त्वचेची काळजी घेण्यासाठी केल्या जाणाऱ्या घरगुती उपायांमध्ये बेसन प्रामुख्यानं वापरलं जातं. टॅन घालवण्यासाठी, क्लिनझर आणि त्वचेचा कोरडेपणा घालवण्यासाठी बेसन उपयोगी ठरू शकतं. तसंच चेहऱ्यावरील मुरुमं घालवण्यासाठी बेसन फायदेशीर ठरतं. बहुपयोगी बेसनाचा कसा उपयोग करू शकता, याविषयी...
१. टॅन काढण्यासाठी
तुमची त्वचा टॅन झाली असेल तर बेसन लावल्यास त्वरीत फरक दिसून येईल. बेसनमध्ये लिंबाचा रस, हळद आणि थोडासा कोरफडीचा गर (उपलब्ध असल्यास) एकत्र करा आणि त्याची पेस्ट बनवा. ही पेस्ट टॅन झालेल्या भागाला लावा. पूर्णपणे वाळल्यानंतर काढून टाका. लिंबाच्या रसाऐवजी टोमॅटोचा रसही वापरू शकता. टोमॅटोचा रस ब्लिचिंग प्रक्रियेस मदत करतं. ही पेस्ट टॅन जाईपर्यंत दररोज वापरु शकता.
(चिमूटभर हळदीमुळे दूर होतील चेहऱ्यावरील मुरुम आणि डाग)
२. क्लिनझर म्हणून उपयोगी
तुमची त्वचा अतिसंवेदनशील असेल तर त्वचेची जळजळ किंवा हानी होणार नाही अशा गोष्टी वापरण्यावर लक्ष केंद्रित केलं पाहिजे. अशा वेळी बेसनचा वापर फायदेशीर ठरु शकतो. बेसन, काकडीचा रस आणि कोरफडीचा गर (उपलब्ध असल्यास) पेस्ट वापरल्यास त्वचेला थंडावा मिळतो. काकडीचा रस आणि कोरफडीच्या गरामध्ये असलेले पोषणमूल्य त्वचेची झालेली हानी भरुन काढण्यास उपयोगी ठरतात.
(घनदाट, लांबसडक केसांसाठी वापरा बेसन आणि दही हेअर मास्क)
३. कोरड्या त्वचेसाठी फायदेशीर
हवामानातील बदलांमुळे आणि प्रदूषणामुळे त्वचा कोरडी पडते. कोरड्या त्वचेची वेळीच काळजी घेतली नाही तर सुरकुत्या येण्याची शक्यता नाकारता येत नाही. तुमची त्वचासुद्धा कोरडी आहे का? मग तुमची ही समस्या बेसन सोडवू शकतं. दुधात बेसन मिक्स करुन ती पेस्ट कोरड्या त्वचेवर लावा. ते वाळल्यावर काढून टाकू शकता. अर्थात, त्वचेवरील वाळलेलं मिश्रण ओढून काढू नका. त्यामुळे आणखीन कोरडेपणा येण्याची शक्यता असते. म्हणून पाण्याचा वापर करुन हलक्या हातानं वाळलेलं मिश्रण धुऊन काढा. शक्य असल्यास पेस्टमध्ये सायदेखील वापरु शकता. कोरडेपणामुळे झालेली त्वचेची हानी भरुन काढण्यासाठी बेसन हा प्रभावी उपाय आहे.
(सफरचंदामुळे चेहऱ्यावरील डाग होतील कमी,असे तयार करा घरगुती फेस पॅक)
४. मुरुमांचा त्रास आहे?
बेसनमध्ये झिंक मोठ्या प्रमाणावर असतं. झिंक हे दाह कमी करण्यास मदत करतं. प्रदूषणामुळे, शरीरातील उष्णता वाढल्यामुळे किंवा इतर अनेक कारणांमुळे चेहऱ्यावर मुरुमं येतात. तुम्हालाही मुरुमांचा त्रास आहे का? मग तुम्ही बेसनाचा वापर करु शकता. बेसनमधील झिंक मुरुमं कमी करण्यास उपयुक्त ठरतं. दोन चमचे बेसन, दोन ते तीन थेंब टी ट्री ऑइल (उपलब्ध असल्यास) आणि एक चमचा गुलाब पाणी एकत्र करुन ते चेहऱ्यावर लावा. अनेकांना दंडावर किंवा पाठीवरसुद्धा फोड असतात. ते घालवण्यासाठीसुद्धा बेसनचा उपयोग होऊ शकतो.
संकलन- लीना देशमुख, आरकेटी कॉलेज
मोबाइल अॅप डाउनलोड करा आणि राहा अपडेट