सध्या घरच्या घरी त्वचेची काळजी कशी घ्यावी, असा हा प्रश्न अनेकांना पडला आहे. तर स्वयंपाकघरात उपलब्ध असलेल्या आणि सहज मिळणाऱ्या काही जिन्नसांचा वापर करुन त्वचेला तजेला देऊ शकता. घरच्या घरी त्वचेची काळजी कशी घ्यावी, याच्या काही टिप्स तज्ज्ञांकडून जाणून घेतल्या. त्या पुढीलप्रमाणे...
० थोडीशी चंदन पावडर, बेसन, हळद आणि साय एकत्र करून त्याची पेस्ट बनवा. यामध्ये निरसं दूध घाला. दूध नैसर्गिक डिटॅनरचं काम करतं. तयार झालेली पेस्ट चेहऱ्यावर लावा. ते वाळल्यावर चेहरा स्वच्छ धुऊन घ्या.
० डोळ्यांखालची काळी वर्तुळं कमी करण्यासाठी निरसं दुधामध्ये कापूस बुडवून तो डोळ्यांवर ठेवू शकता.
० दररोजच्या घरकामांमुळे गुडघे आणि कोपर हे भाग काळे पडण्याची शक्यता नाकारता येत नाही. यावर उपाय म्हणून एक टीस्पून मध, अर्धा टिस्पून लिंबाचा रस एकत्र करून हे मिश्रण पाच ते सात मिनिटं कोपर आणि गुडघ्यांवर लावा. नंतर हे मिश्रण स्वच्छ धुऊन घ्या. ही पेस्ट लावल्यानंतर पुढील २४ तास शक्यतो साबणाचा वापर करू नये.
(Skin Care Tips सुंदर आणि चमकदार त्वचा हवीय? प्या हे घरगुती ड्रिंक)
० बदाम, चारोळी, खसखस, केशर आणि दूध या गोष्टी एकत्र करून तुम्ही फेसपॅक बनवू शकता. हा पॅक चेहऱ्यावर लावा. तो वाळल्यावर काढून टाका. या फेसपॅकमुळे त्वचेला चमक येते. बदामामुळे त्वचेतील ओलावा टिकून राहतो, तर दुधामुळे त्वचेला आवश्यक पोषणद्रव्यं मिळतात.
० जर तुमची त्वचा कोरडी असेल तर तुम्ही त्वचेवर तूप लावून ते काही वेळानंतर धुऊन टाकू शकता. त्वचा तेलकट असल्यास मुलतानी माती आणि गुलाब पाण्याचं मिश्रण त्वचेचा तेलकटपणा कमी करण्यास निश्चितच मदत करेल.
(Natural Skin Care त्वचेचा रंग उजळण्यासाठी प्या गरम पाणी, जाणून घ्या आश्चर्यकारक फायदे)
० काकडी आणि दही एकत्र करुन ती पेस्ट तुम्ही दहा ते पंधरा मिनिटांसाठी डोळ्यांच्या आजूबाजूच्या त्वचेला लावू शकता. दहा-पंधरा मिनिटांनंतर चेहरा धुऊन टाका. यामुळे डोळ्यांखालची काळी वर्तुळं कमी होऊन डोळ्यांना थंडवा मिळण्यास मदत होईल.
० थोडं सी सॉल्ट, नारळाचं तेल किंवा ऑलिव ऑइल एकत्र मिसळून त्याची जाडसर पेस्ट करून घ्या. ही पेस्ट चेहरा वगळून इतर भागांना लावू शकता. या पेस्टमुळे तुमच्या त्वचेला पोषण मिळण्यास मदत होईल.
(Skin Care Tips घरातच करा बॉडी पॉलिशिंग, त्वचेवर येईल नैसर्गिक चमक)
० तुमची त्वचा तेलकट आहे का?
तर तुम्ही दोन चिमूट मीठ २०० मिली पाण्यामध्ये घालून मीठ विरघळेपर्यंत व्यवस्थित मिसळा. यानंतर हे मीठ मिसळलेलं पाणी पाच ते सहा तास सूर्यप्रकाशात ठेवा. सूर्यप्रकाशात ठेवल्यानंतर ते स्प्रे बॉटलमध्ये भरा आणि चेहऱ्यावर स्प्रे करा. यामुळे त्वचेचा तेलकटपणा कमी होण्यास मदत होईल.
संकलन- केतकी मोडक, विद्यावर्धिनीज कॉलेज
मोबाइल अॅप डाउनलोड करा आणि राहा अपडेट