यावेळच्या युवा कट्टात सहभागी झालेलं मुंबई विद्यापीठ आणि संलग्न कॉलेजेस
•झेविअर्स कॉलेज (फोर्ट)
•गर्व्हमेंट लॉ कॉलेज (चर्चगेट)
•एच. आर. कॉलेज (चर्चगेट)
•गर्व्हमेंट पॉलिटेकनिक (वांद्रे)
•तोलानी कॉलेज ऑफ कॉमर्स (अंधेरी)
•भवन्स कॉलेज (अंधेरी)
•एस.एन.डी.टी महिलासंघ कॉलेज (विलेपार्ले)
•डहाणूकर कॉलेज (विलेपार्ले)
•विवेक कॉलेज (गोरेगाव)
•पाटकर कॉलेज (गोरेगाव)
•गोखले कॉलेज (बोरिवली)
•एल्फिनस्टन कॉलेज (परळ)
•महात्मा फुले कॉलेज (परळ)
•एन.एस.एस कॉलेज (ताडदेव)
•रचना संसद अकादमी ऑफ आर्किटेक्चर (दादर)
•गुरू नानक खालसा कॉलेज (माटुंगा)
•रुईया कॉलेज (माटुंगा)
•पोदार कॉलेज (माटुंगा)
•विवा कॉलेज (विरार)
•विकास रात्र कॉलेज (विक्रोळी)
•आचार्य मराठे कॉलेज (चेंबुर)
•विद्यालंकार स्कूल ऑफ इन्फॉर्मेशन टेक्नोलॉजी (वडाळा)
•वझे-केळकर कॉलेज (मुलुंड)
•पिल्लाई कॉलेज (रसायनी)
•सीएचएम कॉलेज (उल्हासनगर)
•सुयश कॉलेज (मुरबाड)
•साठ्ये कॉलेज (विलेपार्ले)
•विल्सन कॉलेज (गिरगाव)
•बिर्ला कॉलेज (कल्याण)
कृतीत दिसू द्या
पारदर्शक कारभार हा नुसताच आश्वासन देऊन पाळला जाणार नाही त्यासाठी तो कृतीत उतरवला पाहिजे. जेव्हा सगळे व्यवहार मग ते एखाद सरकारी काम असो वा महाविद्यालयीन काम असो जेव्हा बिना घोटाळ्याने पार पडतील तेव्हा खरा पारदर्शकतेला अर्थ प्राप्त होईल. अपारदर्शक कारभाराचे प्रकार आपल्याला प्रत्येक सरकारी खात्यामध्ये आणि आता इतकेच नाही तर महाविद्यालयीन कामकाजामध्येसुद्धा आढळून येते. यासाठी सामान्य जनतेनीच पुढाकार घेतला पाहिजे. जर कुठून विरोध होत असेल तर याची थेट तक्रार उच्च अधिकाऱ्यापर्यंत पोहोचवून जनतेसमोर उघड केली पाहिजे. पारदर्शक कारभार करताना स्वतः जनतेनी भ्रष्टाचार कसा टाळता येईल वा तो समोरच्याकडून होत असेल तर तो कसा रोखता येईल याकडे जास्त प्राधान्य दिलं पहिजे, तरच सगळे कारभार पारदर्शकतेने पार पाडण्यात यश येईल.
पूजा कोर्लेकर, एच. आर कॉलेज
काळाची गरज
प्रत्येक नात्यामध्ये, व्यवहारामध्ये आणि व्यवसायामध्ये पारदर्शकता हवीच. विश्वासार्ह्यतेसाठी पारदर्शकता अत्यंत आवश्यक आहे. जर पारदर्शकता नसेल तर आपण भरलेला कर कुठे जातो, त्याचा वापर कसा होतो, रस्त्याची आणि पुलाची रखडलेली कामं अजून पूर्ण का होत नाही या प्रश्नांचं आणि शंकांचे निरसन कसं होणार? पारदर्शकता असेल तर सरकारी कारभाराबद्दल आणि कर्मचारी वर्गाबद्दल गैरसमज उद्भवणारच नाही. भ्रष्टाचार कमी होण्यास याचा नक्कीच उपयोग होईल. २००५ साली अमलात आणलेला माहितीचा अधिकार (RTI) हा पारदर्शकतेचं उत्कृष्ट उदाहरण आहे. अशाप्रकारचे अनेक उपक्रम राबवले तर जनतेला पडलेल्या प्रश्नांचं योग्यप्रकारे निरसन होईल.
श्रेया जाधव, पोदार कॉलेज
पुढची पायरी...भ्रष्टाचार
माझ्या मते, पारदर्शकता म्हणजे कोणत्याही कामाचा प्रत्यक्ष किंवा अप्रत्यक्षपणे कोणाच्या आयुष्यावर फरक पडणार असेल त्यांना त्याविषयी सर्व माहिती असणं. अशा या पारदर्शकतेचा विषय फक्त सरकारपर्यंत सीमित राहत नाही. सामान्य जीवनातही पारदर्शकता असणं महत्त्वाचं आहे. संशय, गैरसमज यासारख्या गोष्टी पारदर्शकता असेल तर नाहीशा होतात. या सर्वाची पुढची पायरी म्हणजे भ्रष्टाचार. पारदर्शकता आणण्यासाठी आर.टी.आयसारखे अनेक अधिकार देण्यात आले. अशा प्रकारे जास्तीत जास्त माहिती जनतेसाठी उपलब्ध करुन दिली पाहिजे.
राहुल हाटे, पोदार कॉलेज
जनतेचा सहभाग महत्त्वाचा
पारदर्शकता म्हणजे स्वच्छ प्रशासन. स्वच्छ प्रशासन म्हणजे केवळ लाच न घेणं नव्हे तर सार्वजनिक निधीचा सर्वोत्तम आणि पूर्ण क्षमतेने वापर करणं. माझं असं मत आहे की, आपल्या प्रशासनात अपारदर्शकता आहे. राजकारण म्हटलं की लगेच डोळ्यासमोर उभं राहतं ते म्हणजे भ्रष्टाचार! यामधील मुख्य त्रुटी म्हणजे नागरिकांचा असहभाग होय. म्हणूनच प्रशासनात पारदर्शकता आणण्यासाठी जनतेचा सक्रिय सहभाग महत्त्वाचा आहे.
कांचन गावस्कर, एच. आर कॉलेज
फक्त आश्वासनांमध्येच
सामान्य जनतेची होणारी पिळवणूक आणि त्यांची सरकारी कामात होणारे हाल याला कारण म्हणजे आपला सरकारी व्यवस्थेचा म्हणा किंवा सरकारी अधिकाऱ्याचा भोंगळ कारभार. पारदर्शी कारभार नुसता आश्वासनात उरला आहे, असं मला वाटतं. आम्ही हे करू ते करू अशा आश्वासनांना आताचे तरुण मतदार भुलणार नाहीत. म्हणून आम्ही पारदर्शी कारभार करू अशी उगाच न पेलणारी आश्वासनं देऊन निवडणूक जिंकता येते. पण त्यानंतर काय? पारदर्शकता ही स्वतःच्या कामात आणि स्वतःच्या वर्तनात असेल तरच ती सामान्यांच्या डोळी दिसेल. पारदर्शकतेची घोषणा करताना एकदा तरी जनतेला विचारात घ्यावं.
प्रथमेश मयेकर, पाटकर कॉलेज
सुस्पष्टता असणं आवश्यक
प्रामाणिकपणे आणि स्पष्टपणे महत्त्वाच्या बाबी आणि माहिती जनतेसमोर मांडणं म्हणजे पारदर्शकता होय. जनतेकडून विविध कर आकारले जातात. या करांचा वापर कसा केला जातो याबाबतची माहिती ही संबंधित यंत्रणेने जनतेला द्यायला हवी. पारदर्शक कारभारासाठी लोकांनीसुद्धा जागरुक असणं आवश्यक आहे. एखाद्या गोष्टीची माहिती हवी असेल तर त्यासाठी संबंधित विषयाची प्राथमिक माहिती अथवा त्याचं ज्ञान लोकांना असायला हवं. त्याचप्रमाणे यंत्रणेकडून योग्य सहकार्य केलं जात नसेल तर अशावेळेस त्या यंत्रणेच्या विरोधात तक्रार नोंदवण्यासाठी सक्षम अशी व्यवस्था हवी. सरकारी यंत्रणांनी जनतेला सहकार्य केलं पाहिजे. त्याचप्रमाणे जनता आणि संबंधित यंत्रणेत दृढ संबंध निर्माण व्हावेत यासाठी प्रयत्न केले गेले पाहिजेत.
वैभव पुरव, डहाणूकर कॉलेज
अयोग्य गोष्टींना चालना
लोकांबरोबर जोडलेल्या प्रत्येक कामात पारदर्शकता असावी. प्रत्येकाने प्रत्येकाचं मत स्वीकारून त्यानुसार कामं केली पाहिजेत. राजकीय पक्षांबरोबरच शिक्षण व्यवस्थेतदेखील पारदर्शकता दिसून आली पाहिजे. गुणांनुसार प्रत्येकाला प्रवेश मिळावा. पारदर्शकतेच्या अभावामुळे काळाबाजार, फसवणूक यासारख्या अयोग्य गोष्टींना चालना मिळते. ही अपारदर्शकता घालून टाकण्यासाठी प्रत्येकाने विविध सामाजिक-राजकीय उपक्रमांमधे भाग घेतला पाहिजे. देशाला प्रगतीपथावर आणण्यासाठी लोकांमध्ये, कामामध्ये, पक्षामध्ये पारदर्शकतेची गरज आहे.
श्वेता सकपाळ, डहाणूकर कॉलेज
सगळाच घोळ
सध्या निवडणूक जिंकायची असेल तर आपलं काम आणि आपल्या व्यक्तिमत्व हे स्वछ तसंच पारदर्शीसुद्धा असणं गरजेचं आहे, असा सगळ्यांचाच समज आहे. पण मुळात राजकारणी लोकांनी पारदर्शी या शब्दाच्या अर्थाचा घोळ घातलाय, असं वाटतं. सर्वच गोष्टीचा लेखाजोखो तसंच सर्वसामान्य जनतेकडून घेतला जाणारा टॅक्स नक्की जातो कुठे? याची माहिती लोकांना देणं आवश्यक आहे. निवडणुकीत होणारा खर्च हा नेमका कुठून आणि कसा येतो त्याचबरोबर कोणाचा आहे हेही जनतेला टाऊक असायला हवं.
अभिजित कानिंदे, पाटकर कॉलेज
आपणही जबाबदार
राजकीय दृष्टीने पारदर्शकतेचा विचार केला तर तो म्हणजे एकप्रकारे एखाद्या राजकीय पक्षाची, नेत्याची चांगली बाजू मांडणं, असं मला वाटतं. निवडणूक आल्या रे आल्या की, सगळ्या राजकीय पक्षांची माणुसकी, कर्तव्य, हे सगळं जागं होतं. काही गोष्टी जनतेसमोर कधीच येत नाहीत. म्हणून मित्रांनो, जशी प्रत्येक गोष्टीत पारदर्शकता असते तशीच अपारदर्शकता ही असते. ज्याचा वापर हे राजकीय पक्ष राजकारणात करतात. त्यामुळे मित्रांनो या राजकीय पक्षांची काही काळापुरती पारदर्शकता पाहून आपण नेत्यांना निवडुन देतो खरं. पण पुढे येणाऱ्या अपारदर्शकतेचा आपण का नाही विचार करत? जेवढे अपारदर्शकतेला हे राजकीय नेते जबाबदार आहेत तेवढेच आपणही जबाबदार आहेत.
अक्षय अनभवणे, विवा कॉलेज
आरटीआयचा वापर व्हावा
सर्वप्रथम आपली किचकट निवडणूक प्रक्रिया पारदर्शक व्हायला हवी. मुळात जर ही नेते मंडळी सुशिक्षित नाहीत तर ते विकास कसे साधणार? रोज नवनवीन कर लावले जातात, घोषणा केल्या जातात. पण त्या अमलात येत नाहीत. त्या अमलात आणाव्या लागतील. आम्हाला सुशोभित फुटपाथ बनवून नकोय, तर शैक्षणिक, आर्थिक आणि नागरी विकासही हवाय. पारदर्शकता हवी असेल तर प्रत्येकाने माहितीच्या अधिकाराचा वापर करायला हवा.
नागेश सुतार, मुंबई विद्यापीठ
विविध माध्यमांचा वापर व्हावा
पारदर्शक कारभार म्हणजे स्वच्छ, अंशाचा सुद्धा संशय किंवा भ्रष्टाचार नसलेला कारभार. सरकारी कारभार होताना व्यवहारात पारदर्शकता आणण्यासाठी जनतेला विश्वासात घेणं सर्वात महत्त्वाचं आहे. त्यांच्यासोबतच जनतेला केलेल्या आश्वासनाची जाणीव ठेवून त्याप्रमाणे केलेली कृती ही तितकीच आवश्यक आहे. ती कृती करताना केलेलं पारदर्शक म्हणजेच स्वच्छ, भ्रष्टाचार न करता केलेलं काम आणि नागरिकांना त्या कामाची पोचपावती देणं, हे होय. जिथं पारदर्शक काम होत नसेल त्यासंबंधी तक्रार करण्यासाठी यंत्रणेने स्वत:ची वेबसाइट बनवून जिथं इंटरनेट किंवा इतर सोयीस्कर माध्यमांनी तक्रार नोंदणी होईल, जातीने लक्ष घालून कारवाई करण्यात येईल याची सोय करावी.
सायली शिंदे, भवन्स कॉलेज
सुरुवात स्वत:पासूनच
माझ्या मते, पारदर्शकता म्हणजे देशात घडणाऱ्या व्यवहारात स्पष्टता, सहजता या गोष्टींचा सुरेख संबंध होय. ट्रॅफिक हवालदारपासून ते रेशनच्या दुकानांपर्यत आणि शाळा, महाविद्यालयापर्यंत सगळीकडेच अपारदर्शक कारभाराचा अनुभव येतो. मला वाटतं जर देशाच्या कारभारात पारदर्शकता आणायची असेल तर स्वतःपासून सुरुवात केली पाहिजे. छोट्या-छोट्या गोष्टींचा जर पाठपुरावा योग्य प्रकारे केला तर नक्कीच कुठेतरी पारदर्शकतेचा उदय होईल. तरीही जर पारदर्शकता येत नसेल तर त्या व्यक्ती आणि प्रवृत्तीविषयी तक्रार नोंदवण्यासाठी तीन अंकी टोल फ्री क्रमांक असावा, एस.एम.एस, ई-मेलसारख्या सहज आणि सोप्या सुविधा उपलब्ध करून द्याव्यात.
भक्ती पालांडे, तोलानी कॉलेज ऑफ कॉमर्स
एकच भाबडी अपेक्षा
अलीकडे झालेल्या मुंबईसह राज्यातल्या दहा महापालिकांच्या निवडणूक प्रचारा दरम्यान पारदर्शकता हा शब्द भाव खाऊन गेला. विकास कामांसाठी लोकप्रतिनिधींना मंजूर केलेला निधी हा बहुतांश वेळेला विकास कामांवर कमी आणि स्वविकासावर जास्त खर्च केला जातो. केंद्र आणि राज्य सरकारच्या योजना आणि प्रकल्पसुध्दा राबवले जातात. त्यासाठी अतिरिक्त निधी मिळतो. त्या निधीचा वापर कुठे आणि कसा होतो हे ही पारदर्शकपणे सामन्यांसमोर मांडलं गेलं पाहिजे. राज्यकारभारात पारदर्शकता आण्यासाठी प्रयत्न हे दोन्ही बाजूंनी होणं अपेक्षित आहे. जर लोकांनी साथ दिली तर प्रचारादरम्यान जितके वेळा पारदर्शक हा शब्द कानी पडला, निदान तितके वेळा तरी सरकारच्या कारभारात पारदर्शकता दिसून यावी हीच भाबडी अपेक्षा.
प्रतिक्षा पाटील, डहाणूकर कॉलेज
पारदर्शकता फक्त चर्चेपुरतीच
भ्रष्टाचारमुक्त आणि निययोजनबद्ध कारभार म्हणजे पारदर्शकता. यंदाच्या निवडणुकीत चर्चिले गेलेला हा शब्द आहे. महानगरपालिका, जिल्हा परिषद, तालुकापातळीवर पारदर्शक कारभार असणं हे देशासाठी आवश्यक आहे. आजच्या डिजिटल युगात अनेक गोष्टींमध्ये निययोजनबद्ध कारभाराची गरज आहे. पारदर्शकता ही अनेक प्रकारच्या कामातून आणि प्रगतीतून दिसून येते. अपारदर्शक कारभाराचा अनुभव हा प्रत्येकाला येत असतो. पण त्याविरोधात आवाज उठवण्यासाठी सरकारी पातळीवर तशी व्यवस्था नाही. त्यामुळे ही गोष्ट लक्षात येऊनसुद्धा नंतर दुर्लक्षित होते. मुंबई विद्यापीठात अनेक गोष्टींमध्ये पारदर्शक गोष्टींचा अभाव जाणवतो. सामान पातळीवर सर्वांना सामान संधी आणि योग्य गोष्टी मिळाल्या तर पारदर्शक कारभार हा खऱ्या अर्थाने दिसून येईल.
निखिल मालवणकर, डहाणूकर कॉलेज
बेगडी मुखवटा
पारदर्शकतेचा जो काही फुगा राजकारण्यांनी निवडणुकीच्या कालखंडात
फुगवला, तो आता निकालानंतर सपशेल फुटलेला आहे. पारदर्शकतेचा बेगडी मुखवटा जनतेसमोर गळून पडलेला आहे. राजकारण्यांचं सोयीचं राजकारण मुंबईकर मतदात्याला कळलं आहे. मुंबईकरांना महापालिकेचं पारदर्शक कारभारात परिवर्तन करायचं होतं म्हणून बहुसंख्येने जनेतेने त्यांना निवडून दिलं. पण एकदा काय निवडून आल्यावर कोण मतदार आणि कसली पारदर्शकता असा पवित्रा राजकारणी घेतात. यामुळे नक्कीच मुंबईकरांचा भ्रमनिरास झालेला आहे. त्यामुळे मनात एकच प्रश्न सलतो की, आणखीन किती दिवस राजकारणी पारदर्शकतेची गाजरं दाखवून निवडणूका लढवणार?
लीना घेगडमल, मुंबई विद्यापीठ
नवीन फॉर्म्युला
पारदर्शकता हे आता निवडणुका लढवण्याचा आणि जिंकवण्याचा जणू नवीन फॉर्म्युला आहे. पण ती पारदर्शकता मला आज ही फक्त भाषण आणि आश्वासनापालीकडे फारशी कुठे आढळत नाही. आजच्या काळाची गरज आहे की, ही पारदर्शकता सामान्य माणसाच्या दैनंदिन आयुष्यात इमानेइतबारे दिसो. जर का आपल्याला भारताचा विकास व्हावा असं वाटत असेल तर आपल्याला लवकरात-लवकर हा पारदर्शक कारभार आणि पारदर्शक विचारसरणी एका शब्दकीय अनुसरातून वास्तविक जीवनात आणली पाहिजे, असं माझं ठाम मत आहे.
अथर्व अणेराव, पोदार कॉलेज
केवळ ढोंगीपणा
नुकत्याच झालेल्या महापालिका निवडणुकीत एक मुद्दा प्रामुख्याने ऐकायला मिळला तो म्हणजे ‘पारदर्शक कारभार’. म्हणजे अगदी सोप्या शब्दांत सांगायचं तर स्वच्छ कारभार, स्वच्छ प्रशासन. स्वच्छ कारभार म्हणजे केवळ लाच न घेणं नव्हे तर सार्वजनिक निधीचा सर्वोत्तम आणि पूर्ण क्षमतेने वापर करणं होय. पण सद्यस्थितीत पारदर्शकतेच्या नावाखाली केवळ ढोंगीपणा चालू आहे. पारदर्शकता हा शब्द नुसताच शब्द न रहाता त्या वर काहीतरी ठोस अशी अमलबजावणी व्हावी एवढीच अपेक्षा आहे.
रमण जगताप, मुंबई विद्यापीठ
...तर इतरही अनुकरण करतील
भारतामध्ये एका शब्दावरुन केवढा कल्लोळ होऊ शकतो याचं मूर्तिमंत उदाहरण म्हणजे सध्याचे महाराष्ट्रातील 'पारदर्शकतेचे' राजकारण. सरकारच्या सर्व कारभाराचा आणि एक अन् एक रुपयाचा लेखाजोखा जनतेच्या डोळ्यांदेखत असणं म्हणजे पारदर्शकता असा अर्थ आम्हाला अभिप्रेत आहे. प्रशासनामध्ये खुलेपणा हवाच पण त्याचबरोबर सरकारचे उत्तरदायित्वसुद्धा तितकंच महत्त्वाचं आहे. जनतेच्या पैशातून जनतेची कामं करुन घेण्यास जेवढा कमी वेळ लागेल तेव्हाच सुशासनाची खरी संकल्पना उदयास येईल. महापालिकेचं अथवा इतर कोणत्याही सरकारी कामकाज एवढं स्वच्छ असलं पाहिजे की, इतरही त्याचे अनुकरण करतील. त्यामुळे दिलेल्या सत्तेचा मान राखावा आणि थोडीशी लाजही ठेवावी एवढंच आमचं म्हणणं आहे.
अक्षय नाईकधुरे, गोखले कॉलेज
देशाचा विकास साधण्यासाठी...
कामे करताना
ठेवा भान
पारदर्शकतेला द्यावा मान
तरच होईल देश महान
वरील उक्तीप्रमाणे जर सर्वच सरकारी क्षेत्रात पारदर्शकपणे कारभार होऊ लागले तर नक्कीच देशाचा विकास होईल. माझ्यामते जर खरोखर सरकारी कामांमध्ये पारदर्शकता आणायची असल्यास असं एखादं माध्यम निर्माण करावं की जे सरकारी योजनेत आणि सामान्य नागरिकात दुवा असलं पाहिजे. जेणेकरुन सामान्य नागिकांची नजर योजनेच्या कार्यप्रणालीवर राहील. यामुळे भ्रष्टाचारला तर आळा बसेलच शिवाय आपल्याला प्रगतीही साधता येईल.
आकाश पाखरे, विकास रात्र कॉलेज
जनहित की स्वहित?
केवळ आम्ही पारदर्शक कारभार करतो, असं म्हणणाऱ्यांना नंतर विसर पडतो पारदर्शकांच्या बाबतीत. एखादे विकास काम करताना त्याचे काय फायदे अन् तोटे आहेत? हे जनहितासाठी योग्य आहे का? हे पटवून देणं म्हणजे पारदर्शक होय. स्वहित न साधता जनहित म्हणजेच पारदर्शकता होय. भ्रष्टाचाराला आळा बसेल तेव्हा कारभार स्वच्छ होईल. नेतेमंडळी केवळ आपल्या मतदारसंघाचा विचार न करता संपूर्ण राज्याच्या विकासाच्या दृष्टीने विचार करतील, शेतकऱ्यांच्या आत्महत्या थांबतील, बेरोजगारांना नोकरीची संधी मिळतील आणि देशातील प्रत्येक स्त्री सुरक्षित होईल तेव्हाच खऱ्या पारदर्शक कारभाराची प्रचिती येईल.
अनिरुद्ध गायकवाड, सेंट झेविअर्स कॉलेज
लेखी नोंदी असाव्यात
पारदर्शक कारभाराची खरी गरज ही सरकारी कार्यलयांमध्ये आहे असं मला वाटतं. कारण आजकाल कोणतंही सरकारी काम करायचं असल्यास आपल्याकडून पैसे घेतले जातात. हे पैसे का घेतले जातात? याची रितसर लेखी नोंदही कुठेही केली जात नाही. यामुळेच भ्रष्टाचार वाढतं. माझ्या मते पारदर्शकता म्हणजेच प्रामाणिकपणा आणि योग्य व्यवहारीपणा. कारण काच जरी पारदर्शक असली तरी त्यावर धूळ बसली की तिचा पारदर्शकपणा काहीच कामाचा राहत नाही.
अक्षय पुळास्कर, गुरू नानक खालसा कॉलेज
भ्रष्टाचार बोकाळलाय!
राज्यात पारदर्शक कारभार व्हावा, असं मुख्यमंत्री म्हणतात. पण कोणत्याच शासकीय कारभारात अद्याप पारदर्शकता आलेली नाही. यामुळे भ्रष्टाचार सर्वत्र बोकाळलाय हे निश्चित. हे मी अनुभवलंय. यासाठी माननीय मुख्यमंत्र्यांनी लवकरात लवकर तोडगा काढावा. सामान्य जनतेकडून कर गोळा केला जातो. पण पुढे त्याचं होतं काय? त्याचा खरंच वापर होतो की, ते सगळे पैसे कोणाच्या खिशात जातात? याची सगळी माहिती जनसामान्यांना मिळाली पाहिजे. पण कारभारात पारदर्शकता आली तरच हे शक्य आहे. त्यादृष्टीने मार्गक्रमण करावं, एवढंच मी सांगू इच्छीतो.
प्रथमेश मराठे, बिर्ला कॉलेज
लोकशाहीचा पाया
आपल्याकडे माहितीचा अधिकार आहे. त्याद्वारे आपण आपल्याला हवी असलेली माहिती मागू शकतो. पण देशातील निरक्षर जनतेला या कायद्याबद्दल माहिती नाही. दुर्गम भागात या अधिकाराबद्दल जागरूकता नाही. लोकशाहीत पारदर्शकता अत्यंत महत्त्वाची आहे. लोकशाही आणि जनता यातील एक दुवा म्हणजे पारदर्शकता. जर यंत्रणेने स्वतःहून प्रत्येक योजनेचा अहवाल जनतेमोर मांडला तर जनतेला माहितीच्या अधिकाराची गरजच भासणार नाही. यामुळे काळा पैसा, भ्रष्टाचार या विकृतींना आळा बसेल. जनतेचा कर स्वरूपातील पैसा त्यांच्या सुविधांसाठी वापरला जाईल. पारदर्शकतेमुळे लोकांचा लोकशाहीवरील विश्वास टिकून राहील. जर पारदर्शकता असेल तर प्रत्येक काम हे वेळेत पूर्ण होईल. मग खऱ्या अर्थाने लोकशाहीत लोकांनी, लोकांसाठी, लोकांचे असे राज्य अस्तित्वात येईल.
आदिती भोसले, विवेक कॉलेज
दोष कुणाचा?
माझ्या मते, तरी पारदर्शकता म्हणजे 'भ्रष्टाचार विरहित कारभार' किंवा 'स्वच्छ व निट-नेटका कारभार' होय. सामान्य माणसाला त्याच्या कुठल्याही सरकारी कामकाजात अडथळा न येता काम होणं म्हणजे पारदर्शकता होय. अपारदर्शक कारभाराचा अनुभव अनेक सरकारी कार्यालायांमध्ये अगदी सहजपणे बघायला मिळतो. हा कारभार पारदर्शक व्हावा यासाठी अशी यंत्रणा हवी की सामान्य माणसाच्या तक्रारी कोणत्याही दुव्यांमार्फत नाही तर प्रत्यक्षपणे संपूर्ण व्यवस्थेसमोर मांडल्या जायला हव्या. संपूर्ण दोष सरकारवर देऊन चालणार नाही. कारण या अपादरर्शक कारभाराला अप्रत्यक्षपणे का होईना त्यात आपणही जबाबदार आहोत. ही व्यवस्था नीट होण्यासाठी आपणच सर्वप्रथम पुढाकार घ्यायला हवा. तरच कुठेतरी पारदर्शक कारभाराचं स्वप्न पूर्ण होण्यास हातभार लागेल.
निखिल अहिरे, सीएचएम कॉलेज
सापेक्ष संकल्पना
पारदर्शकता ही गोष्ट व्यक्ती सापेक्ष आहे. वास्तविक पारदर्शता ही गोष्ट फक्त दुसऱ्याच्या आचरणात आपण पाहतो. त्याची सुरुवात आपणापासून का करत नाही? कारभारातील अपारदर्शता म्हणजे भ्रष्टाचार ना? मग याचा अनुभव गल्लीपासून दिल्लीपर्यंत येतो. मग या अनुभवी आचाराला देशद्रोह का म्हणू नये. देशद्रोही व्यक्तींची फक्त तक्रार करणं योग्य नाही तर शिक्षा असायला हवी. विनोबा भावे यांनी म्हटल्यानुसार ‘स्व’रूप पहा, 'विश्व’रूप नको
संदीप नामदेव, सेंट झेविअर्स कॉलेज
तरुण मंडळींकडून अपेक्षा
सामान्य जनतेला दिलेली भरमसाठ आश्वासने, दुसऱ्या पक्षांवर केलेले आरोप-प्रत्यारोपण, भ्रष्टाचार, केलेले घोटाळे हे सगळे दृश्य नुकत्याच पार पडलेल्या महानगरपालिका निवडणुकीत पाहायला मिळालं. सामान्य जनतेला दिलेली आश्वासने पूर्ण करणे तर दूरच पण पक्षांमधील नेत्यांमध्ये होणारा वैचारिक वाद मिटवला गेला तर नशीबच म्हणावं लागेल. पण या सर्वांमध्ये उल्लेखनीय मुद्दा राजकीय नेत्यांनी उचलून धरला तो पारदर्शकतेचा. खरंच केंद्रापासून ते अगदी स्थानिक प्रशासकीय कामांमध्ये पारदर्शकता हवी. पण जोपर्यंत भ्रष्टाचार कमी होत नाही तोपर्यंत पारदर्शकता येणं कठीणच. आज आपल्या देशात ६५% तरुण वर्ग आहे. भ्रष्टाचार कमी करण्याचा छोटासा प्रयत्न सर्व तरुण वर्गाने केला तर भ्रष्टाचार थोड्या प्रमाणात नक्की कमी होईल आणि कामकाजात पारदर्शकता नक्कीच येईल.
वेदांगी काण्णव, वझे-केळकर कॉलेज
मोबाइल अॅप डाउनलोड करा आणि राहा अपडेट